झाकली मूठ ....

###@@  झाकली मूठ  @@###

शाळेत मराठीच्या तासाला आज सरांनी काही म्हणी शिकवल्या. "झाकली मूठ सव्वा लाखाची" ही म्हण मनात घोकत रोहन घरी आला. आल्या आल्या त्याने आईच्या मागे भुणभुण सुरु केली. आईने त्याने टाकलेल दप्तर उचलून जागेवर ठेवल, त्याचे कपडे बदलून दिले. हातपाय धुवून त्याला जेवायला वाढले. प्रश्नाचे ऊत्तर मिळत नाही म्हणून रोहनची भुणभूण सुरुच होती.

जेवणात नेमकी नावडीची भाजी आहे अन् त्यामुळे चिडचिडीत भर पडणार हे आईच्या लक्षात आल तसे ती लगेच म्हणाली "मी तुला जेवताजेवता सगळे व्यवस्थित समजावून सांगते, तू सुरुवात कर."  रोहन जेवायला बसला, भाजीवर नजर पडताच त्याचा आंबट चेहेरा पाहून आईने विचारले "आज आणखीन कोणत्या कोणत्या म्हणी शिकवल्या ?" रोहन म्हणाला "भाव तेथे देव, नाचता येईना अंगण वाकडे, वड्याचे तेल वांग्यावर आणि झाकली मूठ .... "

आई म्हणाली "बर बर असू दे.  झाकली मूठ सव्वा लाखाची या म्हणीचा अर्थ नाही ना कळाला तुला ? मी सांगते समजावून ... "

"समजा तुमच्या शाळेत एक धावपटू आहे आणि त्याला थेट राष्ट्रीय टीममधे घ्यावे, तो आपल्या शाळेला विजय मिळवून देईल असा काही शिक्षकांचा आग्रह आहे. तेव्हा परीक्षक मंडळी म्हणतात कि आधी राज्यपातळीवरील एखाद्या आंतरशालेय स्पर्धेत त्याची ट्रायल घेऊ. त्यात चांगले यश त्याला मिळाले तर त्याचा समावेश थेट राष्ट्रीय संघात करावा असा हट्ट आपल्याला धरता येईल."

गोष्ट इंटरेस्टिंग वाटल्यामुळे नावडीची भाजी नकळत पोटात जात होती. रोहनने विचारले "मग आई झाली का रेस ? जिंकला का तो ?" भाजीला न्याय मिळतोय पाहून आईचे म्हणीचा अर्थ समजावून सांगणे रंगात आलेल असते. आई म्हणाली "अरे शर्यतीची तारीख, वेळ व ठिकाण सगळ काही नक्की ठरत पण का कोणास ठाऊक, ऐन वेळेला ही रेस, शर्यतच रद्द होते. आता मला सांग कि तो मुलगा खरोखर चांगला धावपटू आहे कि नाही हे लोकांना कळेल का ?"

रोहन म्हणाला "नाही, शर्यतच नाही झाली तर कस कळणार ?" आई म्हणाली "यालाच म्हणतात झाकली मूठ ....." रोहनला म्हणीचा अर्थ बऱ्यापैकी कळाला होता पण या नादात आईने नावडती भाजी खपवल्याचे लक्षात आल्यामुळे तो आरडाओरड करणार तोच आई म्हणाली "शहाण माझ बाळ, जा हात धुवून घे."  हात धुवून आल्यावर त्याने परत त्या रेसचा विषय काढलाच अन् विचारल "आई, शर्यत खरच कॅन्सल झाली होती का ?"

आई म्हणाली "अरे तो मुलगा गल्लीतली शर्यत पण जिंकू नाही शकला, तुला म्हणीचा अर्थ कळावा म्हणुन मी तस सांगीतल." रोहनने बाहेर खेळायला धूम ठोकली आणि इतका वेळ पेपरमधे डोक घालून बसलेले रोहनचे बाबांनी तोंड उघडले.

ते म्हणाले "अग, बरोबर आहे तू म्हणतेस ते. आज रायबरेलीमधे प्रियंकाचे भाषण ऐकल्यावर मलाही झाकली मूठ ... हीच म्हण आठवली होती. कारण तिचे भाषण ऐकल्यावर वाटले कि राहूल परवडला. आणि काँग्रेसने जर ही मूठ उघडली तर .... ?"

बिंदुमाधव भुरे, पुणे